Səmərəli qeydiyyat xidmətləri səyyar ofisdə-“Kütləvi çıxarış” kampaniyası Cəlilabadın 1 şəhərini və 4 kəndini əhatə etdi

Əmlak Məsələləri Dövlət Komitəsi “Kütləvi çıxarış” kampaniyaları ilə qeydiyyat xidmətlərini və hazır çıxarışların təqdim olunmasını vətəndaşlara daha yaxın edir. Yaradılan rahat şərait ilə kənd və qəsəbələrdə yaşayan əhaliyə məşğuliyyətdən ayrılmadan və ərazi idarəsinə getmədən ünvanlarındaca xidmət göstərilir. Kampaniya işləyən insanları da nəzərə alaraq çıxarışları onların fəaliyyət göstərdiyi müəssisələrdə, zavodlarda təqdim edir. 

Səmərəli xidmət və vətəndaş məmnunluğu prinsiplərinə əsaslanan növbəti “Kütləvi çıxarış” kampaniyası fevralın 7-də Cəlilabad rayonu, Göytəpə şəhərində keçirildi. Sosial kampaniya Göytəpə şəhəri ilə yanaşı, Maşlıq, Kazımabad, Komanlı və Bəcirəvan kəndlərini əhatə edib. Səyyar aksiya ilə sadalanan ərazilərdən olan 80-a yaxın sakinə dövlət reyestrindən hazır çıxarışlar təqdim olundu. Dövlət qeydiyyatına alınmış və çıxarışla təmin olunmuş daşınmaz əmlaklar əsasən, fərdi yaşayış evləri, pay torpaqları və həyətyanı torpaq sahələrinə aiddir.

Kampaniya çərçivəsində 50-ə yaxın sakin daşınmaz əmlakını qeydiyyata almaq üçün ilkin sənədlərini səyyar ofislərə təqdim etdi. İlkin qeydiyyat üçün müraciət edən bəzi sakinlərin daşınmaz əmlakları üzrə çöl-ölçmə işləri də aparıldı. Mobil ofisə yaxınlaşan digər sakinlərə xidmətlər barədə məlumat verildi. Qeydiyyat üçün tələb olunan sənədlərin siyahısı, dövlət rüsumları və xidmət haqları, çıxarışların hansı müddətə verilməsi ilə bağlı vətəndaşların sualları cavablandırıldı.

 Respublikanın müxtəlif regionlarında keçirilən belə kampaniyalar daşınmaz əmlakın qeydiyyata alınması prosesini sürətləndirir, vətəndaşların mülkiyyət hüquqlarını daha rahat həyata keçirməsinə şərait yaradır. Dövlət qeydiyyatına alınmış hər bir əmlak isə sahibinə əlavə imkanlar yaradır. Bütün növ daşınmaz əmlakların çıxarışla təminatı onların hüquqi və iqtisadi əməliyyatlara cəlb olunması zamanı yarana biləcək maneələrin qarşısını alır.

Qeyd edilməlidir ki, bununla yanaşı digər sosial aksiya olan “Əmlakını qeydiyyata al və mülkiyyətinə sahib ol” kampaniyası keçirilir. Öncədən elan edilən məkanda fəaliyyət göstərən mobil ofislərdə vətəndaşlara bütün növ qeydiyyat xidmətləri göstərilir.

 
 
 

Sorğu

Daşınmaz əmlak obyektinin müayinə edilməsi xidməti barədə məlumatlısınızmı?