Elektron çıxarışın tətbiqi daşınmaz əmlakın qeydiyyatı prosedurlarını onlayn qaydada aparmağa imkanlar yaradıb

Ölkədə həyata keçirilən uğurlu islahatlar nəticəsində digər sferalarda olduğu kimi daşınmaz əmlakın qeydiyyatı sahəsində də müsbət dinamika müşahidə edilir. Əmlak Məsələləri Dövlət Komitəsi tərəfindən bu sahədə xidmətlərin geniş şəkildə elektron müstəviyə keçirilməsi, prosedurların sadələşdirilməsi, müddətlərin azaldılması torpaqların, o cümlədən daşınmaz əmlakın qeydiyyat sahəsində əlçatanlığı və vətəndaş məmnunluğunu artırıb. Bu isə öz növbəsində daşınmaz əmlak bazarının canlanmasına, alqı-satqı prosesinin intensivləşməsinə, torpaqlardan istifadənin genişlənməsinə, gəlirlilik əmsalının yüksək olmasına imkan verib.

Ardını oxu...

Əmlak Məsələləri Dövlət Komitəsi tərəfindən yeni hərrac elan olunub

 

Ölkədə iqtisadi fəallığı gücləndirmək və özəl təşəbbüslərə dəstək vermək məqsədilə özəlləşdirilmənin sürətləndirilməsi prosesi dinamikliyini qoruyub saxlayır. Bu istiqamətdə görülən işlərin artım tempini təmin etmək üçün isə keçirilən hərraclar xüsusi əhəmiyyət kəsb edir. Hərraclar investorların marağını artırmaqla özəlləşdirilmə sahəsində maksimum operativliyi təmin edir. Dövlət əmlaklarının hərraclar vasitəsilə özəlləşdirilməsi, bu sahədə əlçatanlığın artmasına, iqtisadi inkişafın təmin edilməsinə, yeni müəssisələrin yaranmasına imkan verir.  

Belə ki, Əmlak Məsələləri Dövlət Komitəsi tərəfindən 27 mart tarixində keçiriləcək yeni hərrac elan olunub. Ümumilikdə hərraca 55 dövlət əmlakı çıxarılıb. Bunlardan 23-ü səhmdar cəmiyyəti, 5-i kiçik dövlət müəssisə və obyekti, 16-sı istifadəsiz qeyri-yaşayış sahəsi, 11-i isə nəqliyyat vasitəsidir. Dövlət əmlaklarının çox çeşidli olması investorların həm iri, həm də kiçik biznes layihələrinin reallaşdırılmasına imkan verir.

Hərraca çıxarılan əmlaklar haqqında ətraflı məlumatı komitənin rəsmi saytı olan emdk.gov.az və privatization.az portalının müvafiq bölməsinə daxil olmaqla öyrənmək mümkündür. Qeyd edilməlidir ki, xarici investorları nəzərə alaraq hərracların elanları ingilis dilinə də tərcümə edilib və portalda yerləşdirilib.

Özəlləşməyə çıxarılan əmlaklara istənilən şəxs, investorlar sifariş verə bilər. Ziyarətçilər isə özəlləşdirmə portalında sifariş verdiyi əmlakla bağlı bütün məlumatlarla tanış ola bilərlər. Əmlakın  adı, ünvanı, sahəsi, ilkin start qiyməti və digər informasiyalar portalda yerləşdirilib.

Hərracda əmlak sahibi olmaq istəyən vətəndaşın cəmi 2 sadə proseduru yerinə yetirməsi kifayətdir. Birinci komitənin elektron xidmətlər portalı vasitəsi ilə sifariş verilir, ikinci mərhələdə isə əmlakın satış qiymətinin 10%-i məbləğində behi ödənilməklə hərracda iştirakçı statusu qazanılır. Qeyd edilməlidir ki, sifarişlər hərracın keçirilməsinə 3 bank günü qalanadək verilməlidir.

Prosesə çıxarılan kiçik dövlət müəssisəsi və obyektin 4-ü torpaq sahəsi ilə birlikdə özəlləşdiriləcək. Həm torpaq sahəsinin, həm də tikilinin ayrıca qiymətləndirilməsi aparılıb. Torpaq sahəsi ilə birgə hərraca çıxarılan əmlaklar Şirvan, Zaqatala, Ağstafa və Cəlilabad rayonlarında yerləşir. Hərraca çıxarılan müəssisələr sırasında Şirvan Mexanizasiya Sahəsi, Zaqatalada yerləşən 9 saylı Səyyar Mexanikləşdirilmiş Dəstəsi kimi iri dövlət əmlakları var.

Hərracda fəaliyyətini yenidən qurmaqla daha çox gəlir gətirə biləcək əmlaklar sırasında Hacıqabulda yerləşən 12/1 saylı mağazanı nümunə kimi göstərmək olar. Həmin obyekt investorlar üçün xidmət sahəsində əlverişli obyektdir. Obyektin ümumi faydalı sahəsi 70 kv.m-ə yaxındır.   

Özəlləşdirilməsi nəzərdə tutulan istifadəsiz qeyri-yaşayış sahələrindən 6-sı paytaxtda, 8-i Sumqayıtda qalanları isə Mingəçevir şəhərində, Ağdaş rayonunda yerləşir. Hərraca çıxarılan belə əmlakların sahəsi 18 kv.m ilə 124 kv.m arasında dəyişir. Bu isə vətəndaşlarda seçim imkanını artırır.

Özəlləşdiriləcək səhmdar cəmiyyətləri məişət, təmir-tikinti, sənaye, aqrar, nəqliyyat, inşaat, istehsal və s. sahələrə aiddir. Belə iri müəssisələr sırasında “Mingəçevir Qum Çınqıl”, “Yevlax Kəndkimya Təchizat”, “Astara çay-3”, “Şıxlar Broyler”, “Ağcabədi Aqrotexservis”, “Ucar ağac emalı” kimi səhmdar cəmiyyətlər var. Qeyd edilməlidir ki, hərraca çıxarılan səhmdar cəmiyyətləri paytaxtla yanaşı, respublikanın müxtəlif bölgələrində yerləşir. Prosesə çıxarılan səhmdar cəmiyyətlərin səhm paketləri nizamnamə kapitalının 30-45%-ni təşkil edir.

Hərraca çıxarılan nəqliyyat vasitələrinin markaları da müxtəlifidir. Həmin avtomobillərin buraxılış tarixləri 2004-2008-ci illəri əhatə edir.

Xatırladaq ki, istənilən şəxs və ya media üzvü hərrac günü gəlib hərracda iştirak edərək prosesi izləyə bilər. Eyni zamanda, hərrac zalındakı böyük monitorlar vasitəsilə respublikanın digər şəhər və rayonlarında keçirilən hərraclar da canlı izlənilir.

Əmlak Məsələləri Dövlət Komitəsi yerli və xarici investorları, sahibkarları, iş adamlarını və mülkiyyət sahibi olmaq istəyən hər bir kəsi özəlləşmədə fəal iştirak etməyə dəvət edir.

Əmlak Məsələləri Dövlət Komitəsinin sədri Xaçmazda vətəndaş qəbulu keçirib

Azərbaycan Respublikasının Prezidenti cənab İlham Əliyevin tapşırığına və bölgələrdə vətəndaşların qəbulu cədvəlinə uyğun olaraq Əmlak Məsələləri Dövlət Komitəsinin sədri 23 fevral tarixində Xaçmaz rayonunda vətəndaş qəbulu keçirib. Qeyd edilməlidir ki, regionlarda həyata keçirilən qəbul zamanı daşınmaz əmlak və torpaq idarəçiliyi sahəsində qaldırılan məsələlər, müraciətlərin operativ həll edilməsi və yaranan sualların cavablandırılması istiqamətində tapşırıqlar verilir. Qəbulda Xaçmaz rayonu ilə yanaşı, Quba, Qusar, Şabran rayonlarından olan vətəndaşların müraciətlərinə baxılıb. Səsləndirilən müraciətlər əsasən daşınmaz əmlakın qeydiyyatı, o cümlədən fərdi həyət evi, bələdiyyə tərəfindən müxtəlif məqsədlərlə ayrılmış torpaqlar, pay torpaqları, mənzillər, sovet dövründə kolxoz və ya sovxozlar tərəfindən verilmiş həyətyanı torpaq sahələrinin sənədləşməsi ilə əlaqədar olub. Həmçinin torpaq sahələrinin sərhədlərinin dəqiqləşdirilməsi, vaxtı ilə verilmiş pay torpaqları ilə bağlı faktiki və sənəd uyğunsuzluqlarının aradan qaldırılması, o cümlədən torpaqların təyinatına uyğun istifadəsi, kateqoriyasının dəyişdirilməsi prosedurları istiqamətində də müraciətlər ünvanlanıb. Bəzi müraciətlər dövlət əmlakının özəlləşdirilməsi sahəsinə də aid olub.

Komitə sədri hər bir vətəndaşın müraciətini həssaslıqla dinləyərək onların qanunvericiliklə həlli istiqamətində müvafiq tapşırıqlarını verib. Bir sıra vətəndaş müraciətləri verilən tapşırıqlara əsasən həmin gün öz müsbət həllini tapıb. Araşdırılması tələb olunan müraciətlər qeydə alınaraq, qanunvericiliyə əsasən həlli istiqamətində göstərişlər verilib. Komitənin vəzifə və funksiyalarına aid olmayan məsələlər qeydiyyata alınaraq, aidiyyəti üzrə göndərilməsi üçün komitə sədri tərəfindən tapşırıqlar verilib. Qəbul günü birbaşa müraciət edən vətəndaşlar da komitə sədri tərəfindən qəbul edilərək müraciətləri dinlənib, bir sıra müraciətlər isə yerindəcə həll edilib.

Qəbulun gedişatı zamanı komitə sədri vurğulayıb ki, daşınmaz əmlak və torpaq idarəçiliyi sahəsində xidmətlərə olan əlçatanlıq artırılır, bu sahədə şəffaflıq və vətəndaş məmnunluğunun təmin edilməsi ön planda saxlanılır. Belə ki, tətbiq edilən innovativ tədbirlər, xidmətlərin geniş şəkildə elektron müstəviyə keçməsi, o cümlədən qeydiyyat müddətinin azaldılması, prosedurların sadələşdirilməsi vətəndaş rahatlığının artırılmasına yönəlib. Bu sahədə görülən işlərin nəticəsidir ki, 2017-ci il ərzində daşınmaz əmlakın qeydiyyatı 200 minə yaxın olub. 2016-cı ilin eyni dövrü ilə müqayisədə bu rəqəm 14.5% artıb. Göstəricinin 60 minə yaxını ilkin, 137 mindən çoxu isə təkrar qeydiyyata aid olub.

Vətəndaş məmnunluğunu təmin edən elektron çıxarışın tətbiqi də bu istiqamətdə həyata keçirilən yeniliklərdəndir. Sistemin üstünlükləri barədə vətəndaşlar məlumatlanıblar. Bildirilib ki, onlar artıq Elektron Hökumət Portalında yaradılacaq şəxsi kabinetindən elektron formada çıxarışını ala bilirlər.

Diqqətə çatdırılıb ki, mülkiyyət münasibətlərinin tənzimlənməsində vahid idarəçiliyin təmin olunması məqsədilə “bir pəncərə” prinsipi tətbiq olunur. Həm çıxarışların verilməsi, texniki sənədlərin tərtibi, həm də torpaqların istifadəsi, icarəsi, mülkiyyətə verilməsi, koordinatların uyğunluğu kimi torpaq məsələlərində rəylərin alınması “bir pəncərə”də həll olunur.

Qeydiyyat xidmətlərini bilavasitə ünvanlarda çatdıran “Kütləvi çıxarış” kampaniyası və mobil ofis xidmətləri əhaliyə göstərilən qayğının bariz nümunəsidir. Kampaniya minimum vaxt itkisi ilə, xidmətlərdən maksimum yararlanmağa, vətəndaşların yerindəcə çıxarış əldə etməsinə şərait yaradır.

Torpaqların Elektron Kadastr Uçotu İnformasiya Sisteminin yaradılması ilə bağlı məsələlərə toxunan komitə sədri Kərəm Həsənov qeyd edib ki, bu istiqamətdə işlər uğurla həyata keçirilir. Görülən işlərin nəticəsidir ki, kadastr məlumatlarına istinad etməklə Xaçmaz rayonunun Müqtədir qəsəbəsi və Vələmir kəndindən olan 604 ailənin uzun illərdən bəri mövcud olan torpaqla bağlı problemli məsələləri öz müsbət həllini tapmışdır. Torpaq payı almaq hüququna malik olan, ancaq indiyədək bu hüquqdan yararlana bilməyən 2 min 315 subyektin hər birinə 0,18 hektar pay torpaq sahəsi ayrılıb. Pay torpaqları almış vətəndaşlara isə mülkiyyət hüququnu təsdiq edən sənədlər də təqdim olunub.

Qəbul çərçivəsində komitə sədri fəaliyyət sahələri üzrə göstərilən xidmətlərdə maksimum məmnunluğun, çevikliyin, əlçatanlığın, şəffaflığın təmin olunması məqsədilə bütün zəruri tədbirlərin görülməsi barədə tapşırıqlarını verib. Komitə sədri bildirib ki, əhalinin müraciətləri operativ həll olunmalı, qeydiyyatla bağlı işlər daha da təkmilləşdirilməli, qanunvericilik çərçivəsində vətəndaş maraqları təmin olunmalıdır. Sonda vətəndaşlar razılıqlarını ifadə ediblər.

Komitə sədrinin regional vətəndaş qəbulları qarşıdakı aylarda da davam etdiriləcək.

Cəbhə bölgəsi “Kütləvi çıxarış” kampaniyasının növbəti ünvanı oldu

Cəbhə bölgəsində yaşayan insanların həyat şəraitinin yaxşılaşdırılması, dövlət qurumları tərəfindən göstərilən ictimai xidmətlərdə, o cümlədən dövlət əmlakının sənədləşdirilməsində əlçatanlığın, operativliyin təmin olunması dövlətin daim diqqət mərkəzindədir. Həmin ərazilərdə yaşayan sakinlərin maksimum rahatlığının təmin olunması, məmnunluğunun artırılması üzrə bir çox sahələrdə mühüm tədbirlər keçirilir. Cəbhə bölgəsində yaşayan sakinlər daha bir sahədə də dövlət dəstəyini hiss ediblər.

Belə ki, daşınmaz əmlakın qeydiyyatı sahəsində sosial layihələrdən olan “Kütləvi çıxarış” kampaniyası budəfə cəbhə bölgəsində yaşayan sakinlərə xidmət göstərib, onların rahatlığını təmin edib. Bu addım cəbhə bölgəsi sakinlərinə dövlət qayğısının göstərilməsinin, sosiallıq prinsipinin ön planda olmasının əyani göstəricisidir. Bu kimi kampaniyanın məhz cəbhə bölgəsində təşkil olunmasında məqsəd vətəndaş məmnunluğunun təmin edilməsi, qeydiyyat xidmətlərinin çatdırılmasında çevikliyin daha da artırılmasıdır.

Əmlak Məsələləri Dövlət Komitəsi tərəfindən fevralın 21-də keçirilən növbəti kampaniyanın ünvanı Ağdam rayonunun Qaradağlı, Əfətli, Çəmənli və Sarıcallı kəndləri olub. Qeydiyyat xidmətlərinin birbaşa olaraq cəbhə bölgələrində göstərilməsi sakinlərin əlavə ünvana getmədən rahatlıqla əmlaklarına dair sənəd əldə etməsinə imkan yaradıb.

Qeyd edilməlidir ki, rayonun həmin kəndlərindən olan 220-yə yaxın sakininə qeydiyyatla bağlı xidmət göstərilib. Vətəndaşlar arasında Qarabağ müharibəsi veteranı, qaziləri, şəhid ailələri olub. Qaradağlı kəndindən 75 ailə, Əfətlidən 60, Çəmənlidən 50, Sarıcallıdan isə 35 ailə xidmətlərdən yararlanıblar. Onlardan 100-ə yaxın sakinə birbaşa yaşadıqları ərazilərdə əmlaklarına dair çıxarışlar təqdim olunub. Verilən çıxarışlar əsasən fərdi yaşayış evlərini, pay torpaqlarını, həyətyanı torpaqları əhatə edib. Kampaniya çərçivəsində bir neçə Qarabağ müharibəsi əlillərinin, şəhid ailələrinin birbaşa evlərində qeydiyyat xidmətləri göstərilib. Onların bəzilərinə əmlaklarına dair çıxarışlar təqdim olunub, bəzilərindən isə ilkin hüquqmüəyyənedici sənədlər qəbul edilib.

Eyni zamanda, rayon sakinlərinə əmlaklarına dair ayrı-ayrı vaxtlarda müxtəlif dövlət qurumları tərəfindən verilmiş dövlət aktları, şəhadətnamələr, qeydiyyat vəsiqələri, mənzillər barədə orderlər, eləcədə kolxoz və sovxozlar tərəfindən verilmiş əmrlər və digər sənədlər kütləvi qaydada çıxarışlarla əvəz olunub. Elə həmin gün çıxarış verilməsi məqsədilə 70-ə yaxın sakindən əmlaklarına dair ilkin sənədlər toplanıb.

Vətəndaşlara çıxarışlar təqdim olunmaqla yanaşı, 50 nəfərə yaxın kənd sakininə hüquqi yardım xidmətləri də göstərilib. Onlara çıxarışın əldə edilməsi üçün tələb olunan sənədlərin siyahısı, həmin sənədlərin hansı qurumlardan alınması qaydası, o cümlədən qeydiyyat müddəti və prosedurları izah olunub. Qeydiyyatla bağlı həyata keçirilən yeniliklər, əhalinin işini sadələşdirən elektron xidmətlər, həmçinin “bir pəncərə” prinsipi barəsində məlumat verilib. Vaxtın daha çox şəxsi təsərrüfatların inkişafına sərf etməyə imkan verən kampaniya vətəndaş məmnunluğuna da səbəb olub. Belə ki, sakinlər göstərilən xidmətlərdən razılıqlarını ifadə ediblər. Bildiriblər ki, kampaniya onların işdən ayrılmadan, vaxtlarına qənaət etməklə sənəd almasına şərait yaradıb.

Qeyd edilməlidir ki, çıxarışlar verilməmişdən öncə komitə əməkdaşları tərəfindən mobil ofislər vasitəsilə yerindəcə ilkin sənədlər toplanıb. Xüsusi qurğular vasitəsilə mühəndislik işləri həyata keçirilib. Belə ki, əmlakın müayinəsi, çöl-ölçmə işləri aparılıb, texniki plan-ölçüləri müəyyənləşdirilib.

Bu kampaniya sakinlərin daşınmaz əmlaklarını rahatlıqla qeydiyyata almaqla yanaşı, həm də vətəndaşların mülkiyyət hüquqlarının və əmlaklarının dövlət tərəfindən qorunmasının göstəricisidir. Belə tədbirlər cəbhə bölgəsində əhalinin öz əmlaklarının daha aktiv şəkildə iqtisadi proseslərə cəlb edilməsinə, iqtisadi fəaliyyətin stimullaşdırılmasına, leqal əmlakların sayının artmasına imkan verir. Eyni zamanda bu həmin ərazilərdə daşınmaz əmlak bazarının daha da inkişafına, canlanmasına şərait yaradır.

Qeyd edilməlidir ki, kampaniya paytaxtla yanaşı regionları, hətta ucqar kəndləri əhatə edir, tarlalarda, əkin biçin sahələrində, iş yerlərində keçirilir. Ahıl, fiziki imkanları məhdud, tənha şəxslərə yaşadıqları evlərində, mənzillərində qeydiyyat xidmətləri göstərilir.

Əmlak Məsələləri Dövlət Komitəsi tərəfindən vətəndaşlarının maksimum rahatlığını təmin etməyə yönələn tədbirlər, sosial layihələr davam etdiriləcək, ictimai xidmətlərdə vətəndaş məmnunluğu daha da artırılacaq.