“Azərbaycan Beynəlxalq Daşınmaz Əmlak və İnvestisiya sərgi”si, habelə “Daşınmaz Əmlak, Özəlləşdirmə və İnvestisiyalar” mövzusunda beynəlxalq konfrans keçiriləcək

Əmlak Məsələləri Dövlət Komitəsi, Türkiyənin ElanExpo və Atılım Fuarcılık şirkətlərinin birgə təşkilatçılığı ilə 28-30 noyabr 2017-ci il tarixlərində Baku Expo Mərkəzində “Beynəlxalq Daşınmaz Əmlak və İnvestisiya sərgi”si keçiriləcək. Bununla yanaşı sərginin II günü, 29 noyabr 2017-ci il tarixində Baku Expo Mərkəzində “Daşınmaz Əmlak, Özəlləşdirmə və İnvestisiyalar” mövzusunda beynəlxalq konfrans təşkil ediləcəkdir. Qeyd edək ki, adı çəkilən sərginin açılışı saat 10:30-da, konfrans isə 13:30-da başlayacaq. Hər iki tədbirə KİV-nin nümayəndələri dəvət olunur və giriş sərbəstdir. Sərginin açılışı mərasimində habelə konfransda Komitə sədri cənab Kərəm Həsənov, aidiyyəti xarici dövlət qurumlarının rəhbərləri, səfirliklərin və beynəlxalq şirkətlərin nümayəndə heyətləri iştirak edəcəklər. 

Ötən il də uğurla təşkil olunan sərginin əsas məqsədi Azərbaycanda daşınmaz əmlak sektorunun imkanlarının nümayiş etdirilməsi, bu sahəyə marağın artırılması, həmçinin özəlləşdirmə prosesində xarici və yerli investorların iştirakının daha da genişlənməsidir. Özəlləşdirilmiş müəssisələrə kapital axını ölkənin makroiqtisadi göstəricilərinin, məşğulluğun səviyyəsinin artımına, yeni iş yerlərinin yaradılmasına, ixrac potensialının yüksəlməsinə səbəb olacaq. Həmçinin bu ölkəmizin beynəlxalq nüfuzunun artımına, dünya bazarlarına çıxış imkanlarının genişlənməsinə və daşınmaz əmlak bazarında iqtisadi yüksəlişə gətirib çıxaracaq. Bu mühüm və böyük tədbir həm yerli, həm də beynəlxalq müstəvidə tikinti sektoruna aid nəhəng şirkətləri, daşınmaz əmlak sahəsindəki brend layihələri, əmlak sektoru üzrə investorları Azərbaycanda professional bir məkanda toplayacaq.

Ardını oxu...

Hərracda 18 dövlət əmlakı özəlləşdirilib

Əmlak Məsələləri Dövlət Komitəsi tərəfindən dövlət əmlakının özəlləşdirilməsinin sürətləndirilməsi və idarə edilməsinin səmərəliliyinin artırılması məqsədilə  açıq hərracların keçirilməsi davam etdirilir. Növbəti belə hərrac 21 noyabr tarixində keçirilib. Hərracda 18 dövlət əmlakı özəlləşdirilib. Bunlardan 5-i kiçik dövlət müəssisəsi, 12-i istifadəsiz qeyri-yaşayış sahəsi, 1-i isə yarımtikilidir.  Bakı  şəhəri üzrə 1 kiçik dövlət müəssisəsi və 10 istifadəsiz qeyri yaşayış sahəsi, respublikanın digər şəhər və rayonları üzrə 4 kiçik dövlət müəssisəsi, 2 istifadəsiz qeyri-yaşayış sahəsi, 1 yarımtikili özəlləşdirilib.

Özəlləşdirilən kiçik dövlət müəssisələrindən 1-i Bakının Nəsimi rayonunda, 2-si Yardımlı rayonunda, digərləri isə Gəncə və Şəmkir şəhərində yerləşir. Hərracda sahibini  tapan əmlaklar xidmət, səhiyyə, iaşə sahəsinə aid olub.

Ardını oxu...

Əmlak Məsələləri Dövlət Komitəsinin sədri Kərəm Həsənovun Sumqayıt şəhərində keçirəcəyi vətəndaş qəbulunun tarixi dəyişib

Mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq Əmlak Məsələləri Dövlət Komitəsinin sədri Kərəm Həsənovun 24 noyabr 2017-ci il tarixində Sumqayıt şəhərində keçirəcəyi vətəndaş qəbulunun tarixi dəyişdirilmişdir. Belə ki, vətəndaş qəbulunun tarixi 30 noyabr 2017-ci il tarixinə keçirilmişdir.

Qəbul saat 11:00-da Sumqayıt şəhərində Heydər Əliyev Mərkəzində keçiriləcək. Qəbulda Sumqayıt şəhəri ilə yanaşı Qubadlı rayonundan olan vətəndaşların müraciətlərinə baxılacaq.

Komitə sədri qəbul zamanı komitənin fəaliyyət istiqaməti üzrə, o cümlədən daşınmaz əmlakın qeydiyyatı sahəsinə aid olan müraciətlər, dövlət əmlakının özəlləşdirilməsi, hərraclarda iştirak, icarə əsasında istifadə edilən dövlət obyekti və ya torpaq sahəsinin özəlləşdirilməsi, torpaqların təyinatının qanunsuz dəyişdirilməsi, təyinatına zidd istifadəsi, torpaqların texniki parametrlərinin və koordinatlarının müəyyənləşdirilməsi, ünvan məsələləri və bu sahədə bölgələrdə əhalini maraqlandıran digər məsələlərlə bağlı vətəndaşları qəbul edəcək.

Ardını oxu...

Əmlak Məsələləri Dövlət Komitəsi tərəfindən növbəti hərracın tarixi açıqlanıb

Əmlak Məsələləri Dövlət Komitəsi tərəfindən 19 dekabr tarixində dövlət əmlakının özəlləşdirilməsi üzrə növbəti hərrac keçiriləcək. Qeyd edək ki, dövlət əmlakının özəlləşdirilməsi sahəsində elektron hərracın tətbiqi investorların hərraclara marağını daha da artırıb. Tətbiq edilən yeniliyə əsasən vətəndaşlar hərraclara evindən internet vasitəsilə onlayn şəkildə qatıla bilər. Elektron hərracda iştirak etmək istəyən şəxs Əmlak Məsələləri Dövlət komitəsinin rəsmi saytına (e-emdk.gov) və ya Elektron Hökumət Portalına (e-gov.az ) daxil olaraq müvafiq bölməni seçir. Ümumilikdə isə hərracda qeydiyyatdan keçmək, sifariş vermək elektron qaydada həyata keçirilir. Hərraclar keçirildiyi vaxt istənilən şəxs onlayn olaraq https://e-emdk.gov.az/eHerrac/Home/Presentation linkinə keçid etməklə hərracı canlı izləyə bilər.

Budəfəki hərracda müxtəlif çeşidli 68 dövlət əmlakı öz sahibini axtarır. Bunlardan 24-ü kiçik dövlət müəssisə və obyekti, 8-i istifadəsiz qeyri-yaşayış sahəsi, 25-si səhmdar cəmiyyətləri, 11-i isə nəqliyyat vasitələridir.

Ardını oxu...

Ümumilikdə paytaxtın 12, respublikanın 52 rayonunda vətəndaşlar üçün «Kütləvi çıxarış» kampaniyası keçirilib

Əmlak Məsələləri Dövlət Komitəsi ölkədə daşınmaz əmlakın qeydiyyatının sadələşdirilməsi, bu sahədə sosiallığın və vətəndaş məmnuniyyətinin artırılması üzrə davamlı olaraq tədbirlər keçirir. Bu sahədə mühüm sosial layihələrdən biri olan «Kütləvi çıxarış» kampaniyası bu dəfə noyabrın 17-də Yevlax rayonunda keçirilib. Kampaniya rayonun bir neçə kəndini əhatə edib. Bu sosial tədbir nəticəsində 50 rayon sakininə birbaşa yaşadıqları ərazilərdə əmlaklarına dair çıxarışlar təqdim olunub. Verilən çıxarışlar əsasən fərdi yaşayış evləri, pay torpağı, həyətyanı torpaq sahələrini əhatə edib. Bununla yanaşı həmin gün 30 sakindən gələcəkdə öz əmlaklarına dair çıxarış almaq üçün ilkin hüquq müəyyənedici sənədlər də qəbul edilib.

Ardını oxu...

Daşınmaz əmlakın qeydiyyat prosedurlarının sadələşdirilməsi və müasirləşdirilməsi bu sahədə göstəriciləri artırıb: qeydiyyat ötən ilin yanvar-oktyabr ayları ilə müqayisədə cari ildə 15%-ə yaxın artmışdır

Əmlak Məsələlər Dövlət Komitəsi tərəfindən daşınmaz əmlakın qeydiyyatı prosedurunun sadələşməsi, bu sahədə əlçatanlığın artırılması, elektron xidmətlərin genişləndirilməsi, həyata keçirilən sosial və innovativ layihələr cari ildə də əmlakların qeydiyyatının artmasına gətirib çıxarmışdır. Belə ki, Əmlakın qeydiyyatı kalkulyatorunun istifadəyə verilməsi, Qabaqcadan qeydiyyatın tətbiqi, SMS xidmətlərinin fəaliyyət göstərməsi, bu sahədə maarifləndirmə işlərinin aparılması nəticənin müsbət olmasına təsir göstərir. Bunu statistik göstəricilər də təsdiqləyir.

Belə ki, statistik məlumatlara əsasən 2017-ci ilin yanvar-oktyabr ayları ərzində daşınmaz əmlak üzərində mülkiyyət hüquqlarının dövlət qeydiyyatı 161442 olmuşdur. Bu isə ötən ilin eyni dövrü ilə müqayisədə 14.4% artım deməkdir. Bu göstəricinin 48083-ü (29.8%) ilkin, 113359-u (70.2%) isə təkrar qeydiyyata aid olmuşdur. Mülkiyyət hüquqlarının qeydiyyatı aparılan əmlaklardan 31156-sı fərdi yaşayış və bağ evi, 41889-u mənzil, 81652-si torpaq sahəsi, 2980-i qeyri-yaşayış binası, 2869-u qeyri-yaşayış sahəsi, 628-i əmlak kompleksi, 118-i çoxmərtəbəli yaşayış binası, 150-si isə çoxillik əkmələr təşkil etmişdir.

Ardını oxu...

Komitəyə daxil olan vətəndaşların müraciətləri çevik cavablandırılır, operativ araşdırılır

Əmlak Məsələləri Dövlət Komitəsi vətəndaşların müraciətlərinə həssaslıqla baxılması, göstərilən ictimai xidmətlərdə operativlik və şəffaflığın artırılması istiqamətində işləri təkmilləşdirməkdə davam edir. Komitə xidmətlərdə vətəndaş məmnunluğunun artırılması, fəaliyyət istiqamətləri üzrə yaranan sualların tez bir zamanda cavablandırılması kimi məsələlərə xüsusi diqqətlə yanaşır. Bu məqsədlə Komitənin 193 vahid çağrı mərkəzi fəaliyyət göstərir. Eyni zamanda əhalinin müraciətlərinin operativ cavablanıdırılması üçün Komitənin facebook (https://www.facebook.com/emlakkomitesi/) və instagramda (https://www.instagram.com/emlakkomitesi/) rəsmi səhifələri mövcuddur. Bununla yanaşı emdk.gov.az veb saytının onlayn müraciət və “Privatization.az” portalının onlayn məsləhət pəncərəsi də vətəndaşların xidmətindədir. 

Ümumilikdə oktyabr ayı ərzində qeyd edilən vasitələr üzərindən 900-ə yaxın müraciət daxil olub. Onların 750-dən çoxu 193 vahid çağrı mərkəzinin, 130-a yaxını sosial şəbəkələrin, qalanı isə “Privatization.az” portalının onlayn məsləhət pəncərəsinin payına düşür. Cəmi müraciətlərin 700-ə yaxını Bakının, 180-dan çoxu isə regionların payına düşür.

Ardını oxu...

Hərraclarda hər bir sərmayəçi öz biznes portfelinə uyğun əmlak sahibi olur

Hüquqi və fiziki şəxslərin, investorların, vətəndaşların daha operativ, optimal şəkildə əmlak sahibi olmaqları üçün keçirilən açıq və şəffaf hərraclar davam edir. Bu hərraclarda iştirak edən hər bir sərmayəçi biznes layihələrinə uyğun olaraq özəlləşdirilməyə çıxarılan müxtəlif çeşidli əmlak üzrə seçim imkanı qazanır. Əmlak Məsələləri Dövlət Komitəsi tərəfindən növbəti belə bir hərrac 14 noyabr tarixində keçirilib.

Hərracda özəlləşdirilən kiçik dövlət müəssisələri Masallı və Daşkəsən şəhərlərində yerləşir. Həmin kiçik dövlət müəssisələri xidmət və kənd təsərrüfatı sahələrində əlverişli hesab edilir. Belə ki, Masallıda yerləşən ümumi faydalı sahəsi 558,5 kv.m olan obyekt xidmət sahəsinə aid olmaqla investorlar üçün yaxşı gəlir mənbəyidir. Daşkəsəndə yerləşən Lüləli mal-qara qəbulu məntəqəsi də sahibi üçün qazanclı obyektdir. Adı çəkilən əmlakın ümumi faydalı sahəsi 636,7 kv.m təşkil edir. Torpaq sahəsi isə 58 min 408 kv.m-dir.

Ardını oxu...

Hərraca 151 dövlət əmlakı çıxarılıb

Əmlak Məsələləri Dövlət Komitəsi tərəfindən 12 dekabr tarixində keçirilməsi nəzərdə tutulan yeni hərrac elan olunub. Hərraca ümumilikdə 151 dövlət əmlakı çıxarılıb. Bunlardan 19-u səhmdar cəmiyyəti, 70-i kiçik dövlət müəssisə və obyekti, 62-i istifadəsiz qeyri-yaşayış sahəsidir.  

Hərraca çıxarılan əmlaklar haqqında ətraflı məlumatı aşağıdakı linkdən əldə etmək mümkündür:

http://privatization.az/index.php/az/component/content/article?layout=edit&id=2903

Qeyd edək ki, hərrac barədə informasiyalar komitənin rəsmi internet səhifəsi, Özəlləşdirmə portalı (privatization.az) və facebook səhifəsində yerləşdirilib. Hərraca çıxarılan əmlaklara istənilən şəxs, investorlar sifariş verə bilər. Ziyarətçilər isə özəlləşdirmə portalında sifariş verdiyi əmlakla bağlı bütün məlumatlarla tanış ola bilərlər. Əmlakın  adı, ünvanı, sahəsi, ilkin start qiyməti və digər informasiyalar portalda yerləşdirilib.

Ardını oxu...

Cenevrədə keçirilən beynəlxalq konfransda Azərbaycanın daşınmaz əmlak idarəçiliyi sahəsində uğurlarından danışılıb

Cenevrədə BMT-nin Avropa İqtisadi Komissiyasının Mənzil Təsərrüfatı və Daşınmaz Əmlakın İdarəedilməsi Komitəsinin 78-ci sessiyası keçirilib. Sessiyada ölkəmizi Əmlak Məsələləri Dövlət Komitəsinin sədri Kərəm Həsənovun rəhbərliyi ilə nümayəndə heyəti təmsil edib.

Sessiyada Dayanıqlı Mənzil Təsərrüfatı Xartiyası, 2030-cu ilə qədər dayanıqlı inkişaf hədəflərinin qlobal göstəricilər sistemi, BMT Avropa İqtisadi Komissiyasının Mənzil Təsərrüfatı və Daşınmaz Əmlakın İdarəedilməsi Komitəsi tərəfindən son bir il ərzində həyata keçirilən tədbirlər, Avropa İqtisadi Komissiyası regionu üçün 2014-2020-ci illər üzrə Mənzil Təsərrüfatı və Daşınmaz Əmlak İdarəçiliyi Strategiyası və Tədbirlər Planının icra vəziyyəti nəzərdən keçirilib, habelə aidiyyəti mövzularda ölkələrin təqdimatları dinlənilib. Bununla yanaşı, sessiya çərçivəsində daşınmaz əmlak idarəçiliyi məsələləri də müzakirə edilərək, bu sahədə həyata keçirilmiş tədbirlərin icra vəziyyəti və daşınmaz əmlak idarəçiliyinin müxtəlif aktual mövzuları barədə fikir mübadiləsi aparılıb.

Ardını oxu...

Neftçalada mobil laboratoriyalar vasitəsilə fermerlərin torpaqlarında analizlər aparılıb

Azərbaycan Respublikası Prezidenti cənab İlham Əliyevin “Azərbaycan Respublikasında torpaq münasibətlərinin tənzimlənməsi sahəsində əlavə tədbirlər” haqqında Fərmanına əsasən Əmlak Məsələləri Dövlət Komitəsi respublika ərazisində irimiqyaslı çöl-torpaq tədqiqatı işlərinin aparılması, torpaq analizlərinin vaxtında və keyfiyyətlə yerinə yetirilməsi istiqamətində bir sıra innovativ tədbirlər həyata keçirir. Bu işlər Komitənin nəzdində fəaliyyət göstərən stasionar və mobil torpaq, bitki laboratoriyaları vasitəsilə həyata keçirilir. Belə ki, Mobil laboratoriyalar birbaşa kəndlinin, fermerin, əkin biçin işi ilə məşğul olunan təsərrüfatlarında xidmət göstərməklə operativ qaydada torpaqların keyfiyyət göstəricilərini və məhsuldarlığı müəyyən edir, o cümlədən torpaq münbitliyinin artırılmasına dair fərdi qaydada tövsiyələrini verir. Bunun nəticəsində isə fermerlər əkin sahələrinin yararlı olub olmamasını, hansı növ bitkilərin əkilməsinin daha optimal olduğunu əvvəlcədən öyrənə bilirlər.

Ardını oxu...

Onlayn hərrac iştirakçısı əmlak sahibi olub

Əmlak Məsələləri Dövlət Komitəsi tərəfindən dövlət əmlakının özəlləşdirilməsinin sürətləndirilməsi və idarə edilməsinin səmərəliliyinin artırılması məqsədilə  açıq hərracların keçirilməsi davam etdirilir. Növbəti belə hərrac 7 noyabr tarixində keçirilib. Hərracda 21 dövlət əmlakı özəlləşdirilib. Bunlardan 1-i səhmdar cəmiyyəti, 5-i kiçik dövlət müəssisəsi, 12-i istifadəsiz qeyri-yaşayış sahəsi, 2-si nəqliyyat vasitəsi, 1- i isə özəlləşdirilən obyektin altında yerləşən torpaq sahəsidir. Bakı  şəhəri üzrə 1 səhmdar cəmiyyəti, 11 istifadəsiz qeyri yaşayış sahəsi və 2 nəqliyyat vasitəsi, respublikanın digər şəhər və rayonları üzrə 5 kiçik dövlət müəssisəsi, 1 istifadəsiz qeyri-yaşayış sahəsi, 1 özəlləşdirilən obyektin altında yerləşən torpaq sahəsi özəlləşdirilib.

Ardını oxu...

Əmlak Məsələləri Dövlət Komitəsi tərəfindən dekabr ayının ilk hərracı elan olunub

Əmlak Məsələləri Dövlət Komitəsi tərəfindən 5 dekabr tarixində dövlət əmlakının özəlləşdirilməsi üzrə növbəti hərrac keçiriləcək. Qeyd edilməlidir ki, dövlət əmlakının özəlləşdirilməsi sahəsində elektron hərracın tətbiqi investorların işini xeyli sadələşdirib. Sistem sərmayəçilərə hərraclara evindən internet vasitəsilə onlayn şəkildə qatılmaq imkanları yaradır. Elektron hərracda iştirak etmək istəyən şəxs Əmlak Məsələləri Dövlət komitəsinin rəsmi saytına (e-emdk.gov) və ya Elektron Hökumət Portalına (e-gov.az ) daxil olaraq müvafiq bölməni seçir. Ümumilikdə isə hərracda qeydiyyatdan keçmək, sifariş vermək elektron qaydada həyata keçirilir. Hərraclara qeydiyyatdan keçmədən onlayn olaraq https://e-emdk.gov.az/eHerrac/Home/Presentation linkinə keçid etməklə canlı izləmək imkanı da var.

Ardını oxu...

“Kütləvi çıxarış” kampaniyasının növbəti ünvanı Şəmkir rayonu olub

Əmlak Məsələləri Dövlət Komitəsinin fəaliyyət dairəsini və coğrafiyasını daha da genişləndirən “Kütləvi çıxarış” kampaniyası 3 noyabr tarixində Şəmkir rayonunun sakinlərinə xidmət göstərib. Kampaniya rayonun bir neçə kəndini əhatə edib. Bu sosial tədbir nəticəsində 50-ə yaxın rayon sakininə birbaşa yaşadıqları ərazilərdə əmlaklarına dair çıxarışlar təqdim olunub. Verilən çıxarışlar əsasən fərdi yaşayış evləri, pay torpağı, həyətyanı torpaq sahələrini əhatə edib. Kampaniya zamanı “Daşınmaz əmlakın dövlət reyestri haqqında” Qanun qüvvəyə minən tarixədək vətəndaşlara verilmiş aktlar, şəhadətnamələr, qeydiyyat vəsiqələri və digər hüquq təsdiq edən sənədlər kütləvi qaydada dövlət reyestrindən çıxarışlarla əvəz edilib. Qeyd edilməlidir ki, Kampaniya çərçivəsində ilkin sənədlər komitə əməkdaşları tərəfindən çıxarışlar verilməmişdən öncə sakinlərdən bilavasitə ünvanlardaca toplanıb.

Ardını oxu...

«Doing Business 2018» hesabatında Azərbaycan daşınmaz əmlakın qeydiyyatına görə daha bir pillə irəliləyib

Dünya Bankı və Beynəlxalq Maliyyə Korporasiyasının tərtib etdiyi ənənəvi illik «Doing Business 2018» hesabatında Azərbaycan əmlakın qeydiyyatı sisteminin inkişafina görə 190 ölkə arasında ilk yerlərdən birini tutub. 2018-ci il üçün tərtib edilən hesabatda bildirilir ki, Azərbaycan mülkiyyət hüququnun qeydiyyatı ilə bağlı prosedurların sayının azlığına, müddətin qısalığına və qeydiyyat xərclərinin azlığına görə, dünyanın və MDB-nin əksər ölkələrini qabaqlayır. 

Belə ki, əmlakın qeydiyyatının sadəliyinə görə Azərbaycan ötən il ilə müqayisədə daha bir pillə irəliləyərək 21-ci yerdə qərarlaşıb. Bu göstərici ilə isə biz Polşa, Rumıniya, Bolqarıstan, Avropa və Mərkəzi Asiya ölkələrini qabaqlayırıq.

Ardını oxu...

Özəlləşdirmə portalına 1 milyondan artıq baxış olub

Əmlak Məsələləri Dövlət Komitəsi tərəfindən ötən ilin avqust ayında istifadəyə verilən Özəlləşdirmə portalının fəaliyyəti öz müsbət nəticəsini verməkdədir. Yarandığı vaxtdan portala 1 milyondan artıq baxış olub. Təkcə bu il ərzində isə portala 665 minə yaxın ziyarətçi daxil olub. Statistik göstəricilərdən maraqlı məqam ondan ibarətdir ki, portalın gün və ay ərzində istifadəçi sayı çoxluq təşkil edir. Belə ki, portala bir ayda 86 minə yaxın, gün ərzində isə 3 mindən çox investor və vətəndaş baxışı olub. Bildirilməlidir ki, portala daxil olanların 67,8%-i mobil telefonla, 32,2%- i isə kompüter vasitəsilə ziyarət edib.

Ardını oxu...

Budəfəki hərracda hər bir sərmayəçi öz biznes portfelinə uyğun əmlak sahibi olub

Hüquqi və fiziki şəxslərin, investorların, vətəndaşların daha operativ, optimal şəkildə əmlak sahibi olmaqları üçün keçirilən açıq və şəffaf hərraclar rəqabətli şəkildə davam edir. Bu hərraclarda iştirak edən hər bir sərmayəçi biznes layihələrinə uyğun olaraq özəlləşdirilməyə çıxarılan müxtəlif çeşidli əmlak üzrə seçim imkanı qazanır. Əmlak Məsələləri Dövlət Komitəsi tərəfindən növbəti belə bir hərrac 31 oktyabr tarixində keçirilib.

Budəfəki hərrac da rəqabətli şəkildə keçib. Nəqliyyat vasitələri üzrə hərrac rəqabətliliyi ilə seçilib. Müxtəlif markalı avtomobillərə alıcı marağı yüksək olub. Belə ki, özəlləşdirilməyə çıxarılan Kia Sportage nəqliyyat vasitəsinə 5 sifariş verilib. İlkin start qiyməti 4000 manata olan bu avtomobil ən son 10 min 300 manata özəlləşdirilib.

Eyni tendensiya Daewoo Leganza markalı avtomobilin hərracında da müşahidə edilib. Belə ki, ilkin start qiyməti 1127 manata olan Daewoo Leganza 1900 manata sahibini tapıb.

Ardını oxu...

Əmlak Məsələləri Dövlət Komitəsi tərəfindən növbəti hərrac elan edilib

Əmlak Məsələləri Dövlət Komitəsi tərəfindən 28 noyabr tarixində dövlət əmlakının özəlləşdirilməsi üzrə növbəti hərrac keçiriləcək. Vətəndaşların və potensial investorların bu hərracda özəlləşməyə çıxarılan 158 dövlət əmlakına sahib olmaq imkanı var. Bunlardan 64-ü kiçik dövlət müəssisə və obyekti, 63-ü istifadəsiz qeyri-yaşayış sahəsi, 23-ü səhmdar cəmiyyətləri 8-i isə nəqliyyat vasitələridir.

Hərraca çıxarılan səhmdar cəmiyyətləri sırasında pambıqçılıq, quşçuluq, kəndkimya, nəqliyyat, inşaat, təmir, ticarət, istehsal, emal və sair sahələrə aid müəssisələr vardır. Belə səhmdar cəmiyyətlərinə “Yevlax Kəndkimya Təchizat”, “Ağcabədi Aqrotexservis”, “Neftçala Ət”, “Port İliç Xidmət“, “Şıxlar Broyler”, “Mingəçevir Qum Çınqıl“ və digər bu kimi səhmdar cəmiyyətləri aiddir. Qeyd edilməlidir ki, hərraca çıxarılan səhmdar cəmiyyətləri paytaxtla yanaşı, respublikanın müxtəlif bölgələrində yerləşir. 

Ardını oxu...

Əmlak Məsələləri Dövlət Komitəsinin sədri Kərəm Həsənov Şirvan şəhərində 3 rayonun vətəndaşlarının müraciətlərini dinləyib

Azərbaycan Respublikası Prezidentinin tapşırıqlarına əsasən mərkəzi icra hakimiyyəti orqanları rəhbərləri tərəfindən regionlarda vətəndaşların qəbulu prosesi davam etdirilir. Növbəti belə qəbul 27 oktyabr tarixində Əmlak Məsələləri Dövlət Komitəsi sədri Kərəm Həsənov tərəfindən Şirvan şəhərində keçirilib. Qəbulda Şirvan şəhəri ilə yanaşı Hacıqabul, Sabirabad rayonlarından olan vətəndaşların müraciətlərinə də baxılıb.

Qəbulda müxtəlif sosial təbəqədən və yaş həddindən olan vətəndaşlar iştirak edərək komitə sədrinə müraciətlərini bildiriblər. Komitə sədri qəbula gələn hərbir vətəndaşı diqqətlə dinləyib, səsləndirilən bir sıra müraciətlərin dərhal həlli üçün göstərişlərini verib. Vətəndaşlara onların müraciətləri ilə bağlı mövcud qanunvericiliyin tələbləri çatdırılıb. Araşdırılması zəruri olan müraciətlər isə qeydiyyata alınıb. Komitənin səlahiyyətinə aid olmayan müraciətlərin isə aidiyyəti üzrə çatıdırılacağı vətəndaşlara bildirilib. Qəbul günü birbaşa müraciət edən vətəndaşlar da komitə sədri tərəfindən ayrı-ayrılıqda qəbul edilərək müraciətləri üzrə mövcud qanunvericiliyin tələbləri və zəruri prosedurlar izah olunub.

Ardını oxu...

Heydər Əliyev Fondunun təşəbbüsü ilə Əmlak Məsələləri Dövlət Komitəsi Sabirabadda daşqından sonra inşa edilən evlərə çıxarışlar verib

Heydər Əliyev Fondunun dəstəyi ilə ölkəmizdə bir çox sosial layihələr, iri proqramlar, genişmiqyaslı işlər həyata keçirilir. Fond əhalinin maddi rifahının yaxşılaşması istiqamətində çoxşaxəli və səmərəli fəaliyyət göstərir, mühüm tədbirlərə imza atır Elm, təhsil, səhiyyə, mədəniyyət və bir çox sosial sahələrin inkişafında öz yardımını göstərir. Xeyirxahlıq missiyasını həyata keçirən Heydər Əliyev Fondu vətəndaşların mənzil şəraitinin yaxşılaşdırılması istiqamətində də mühüm işlər görür. Bu tədbirlərdən biri də Sabirabad rayonunun Ulacalı kəndində daşqından sonra evlərin yenidən tikilməsi və bərpası olub. Qeyd edilməlidir ki, Sabirabad rayonu ərazisində 2010-cu il Kür daşqınları zamanı vətəndaşların dağılmış, yararsız hala düşmüş evlərinin əvəzinə dövlət tərəfindən yeni mənzillər inşa edilmişdir. Heydər Əliyev Fondunun sosial layihəsinə Əmlak Məsələləri Dövlət Komitəsi də dəstək verib. Belə ki, Komitə Fondla birgə oktyabrın 27-də Sabirabadda dövlət tərəfindən yeni inşa edilmiş evlərə çıxarışlar verib. Sakinlərə evləri üzərində mülkiyyət hüququnu təsdiq edən sənəd təqdim edilib.

Ardını oxu...

Fermerlər mobil laboratoriyalar vasitəsilə yaxşı məhsul əldə edə bilərlər: Bu il 6 rayonun fermerlərinə xidmət göstərilib

Azərbaycan Respublikasının Prezidenti cənab İlham Əliyev tərəfindən torpaqların keyfiyyətinin müəyyənləşdirilməsi, münbitliyin öyrənilməsi, torpaqlardan səmərəli istifadənin təmin edilməsi istiqamətində bir sıra tapşırıqlar verilib. Tapşırıqların icrası olaraq Əmlak Məsələləri Dövlət Komitəsi bu sahədə fəaliyyətini genişləndirib. Belə ki, Komitə respublika ərazisində irimiqyaslı çöl-torpaq tədqiqatı işlərinin aparılması istiqamətində ardıcıl tədbirlər görür. Bu işlər Komitənin nəzdində fəaliyyət göstərən stasionar və mobil laboratoriyalar vasitəsilə həyata keçirilir. Mobil laboratoriyaların köməyilə birbaşa kəndlinin, fermerin məşğul olduğu sahələrdə xidmət göstərilməklə operativ qaydada, vaxt itkisi olmadan torpaqların tədqiqatı aparılır, bu barədə analizlərin nəticələri sifarişçiyə yerində təqdim edilir.

Ardını oxu...